Valgerður Sverrisdóttir, viðskiptaráðherra og Geir H. Haarde, fjármálaráðherra, undirrituðu í dag kaupsamning f.h. íslenska ríkisins við Eglu hf., Vátryggingafélag Íslands hf., Samvinnulífeyrissjóðinn og Eignarhaldsfélagið Samvinnutryggingar um kaup þeirra síðarnefndu á 45,8% hlutabréfa í Búnaðarbanka Íslands hf. Egla er hlutafélag í eigu þýska bankans Hauck & Aufhäuser Privatbankiers KGaA, Kers hf. og Vátryggingafélags Íslands hf. Kaupsamningurinn var undirritaður í höfuðstöðvum Búnaðarbankans í Reykjavík. Hann er gerður á grundvelli samkomulags aðila frá 15. nóvember 2002. Þar var m.a. kveðið á um að kaupverð væri rúmlega 11,9 milljarðar króna.

 

• Afhending og greiðsla hlutabréfanna verður tvískipt. Annars vegar 27,48% hlutafjár í kjölfar undirritunar kaupsamningsins og að fengnu samþykki Fjármálaeftirlitsins, hins vegar rúmlega 18,32% eigi síðar en 20. desember 2003.
• Núvirt meðalgengi hlutabréfa í viðskiptunum er 4,81.
• Kaupverð er að tveimur þriðju hlutum greitt í Bandaríkjadölum og verður einkum nýtt til greiðslu erlendra skulda ríkissjóðs.
• Hlutabréf, sem nema þriðjungi heildarhlutafjár í Búnaðarbanka Íslands hf., eru bundin þeim kvöðum að kaupendum er óheimilt að selja þau í 21 mánuð frá undirritun kaupsamningsins nema að fengnu skriflegu samþykki seljanda. Samkvæmt samningum koma kaupendur fram sem einn hluthafi.
• Eftir þessi viðskipti er eignarhlutur ríkisins í Búnaðarbanka Íslands hf. um 9%.

 

 

 

Eignarhlutir samkvæmt samningnum skiptast með eftirfarandi hætti milli kaupenda:

Hlutfall

Egla hf.                                                                                                71,2%

- Hauck & Aufhäuser Privatbankiers KGaA. 35,6%

- Ker hf.                                                                         35,2%

- Vátryggingafélag Íslands hf.                                 0,4%

 

Vátryggingafélag Íslands hf.                                                   12,7%

Samvinnulífeyrissjóðurinn                                                                   8,5%

Eignarhaldsfélagið Samvinnutryggingar                                        7,6%

Alls                                                                                                      100%

 

 

Framkvæmdanefnd um einkavæðingu hafði umsjón með sölunni af hálfu ríkisins. Aðalráðgjafi nefndarinnar var enski bankinn HSBC. Aðalráðgjafi kaupenda var franski bankinn Société Générale.