Frekari upplýsingar úr reikningi sjá meðfylgjandi skjal, ReykjavíkurborgFréttatilkynning

 

Í dag hélt Þórólfur Árnason borgarstjóri blaðamannafund í Ráðhúsi Reykjavíkur þar sem ársreikningur borgarinnar  fyrir árið 2002 var lagður fram. Ársreikningurinn var kynntur í Borgarráði í hádeginu og verður svo ræddur á aukafundi borgarstjórnar sem fram fer á morgun.

  

1.  Nýjar reikningsskilareglur

 

Við gerð ársreiknings fyrir árið 2002 er horfið frá sértækri reikningsskilaaðferð og framsetningu við gerð ársreikninga sveitarfélaga.  Reikningsskil sveitarfélaga eru nú færð til samræmis við almenn reikningsskil fyrirtækja.  Í bókhaldi er lögð áhersla á að leiða fram beinan raunkostnað einstakra rekstrareininga á reikningsárinu.  Af þeim ástæðum á til að mynda að krefja rekstrareiningar um hlutdeild í sameiginlegum rekstrarkostnaði og reikna og færa innri leigu vegna húsnæðis, tækja og áhalda.  Í áritun borgarendurskoðanda á ársreikning Reykjavíkurborgar kemur fram að hann gefi glögga mynd af rekstri árið 2002, efnahag í árslok og breytingu á handbæru fé árið 2002 í samræmi við lög, reglur og góða reikningsskilavenju.

 

Rekstrareiningar borgarinnar skiptast í A- og B-hluta og endurspeglast sú skipting í reikningsskilunum.  Til A-hluta, þ.e. borgarsjóðs, telst starfsemi sem að hluta eða öllu leyti er fjármögnuð með skatttekjum.  Um er að ræða aðalsjóð (málaflokka), eignasjóð, skipulagssjóð og Innkaupastofnun Reykjavíkur.  Til B-hluta teljast fjárhagslega sjálfstæð fyrirtæki sem að hálfu eða meiri hluta eru í eigu borgarinnar en rekstur þeirra er að stofni til fjármagnaður með þjónustutekjum.  Fyrirtækin eru:  Aflvaki hf. Alþjóðahúsið ehf. Bílastæðasjóður Reykjavíkur, Félagsbústaðir hf. Fráveita Reykjavíkur, Malbikunarstöðin Höfði hf. Orkuveita Reykjavíkur, Reykjavíkurhöfn, Skíðasvæði höfuðborgarsvæðisins, Slökkvilið höfuðborgarsvæðisins bs. Sorpeyðing höfuðborgarsvæðisins bs. Strætó bs. og Vélamiðstöð ehf.

 

2.  Samræmi milli rekstrar og fjárheimilda málaflokka

 

Vegna nýrrar framsetningar ársreiknings er flókið að greina frávik frá fjárhagsáætlun í rekstri málaflokka borgarinnar eins og tíðkast hefur.  Í hjálagðri endurskoðunarskýrslu Borgarendurskoðunar á bls. 19 er tafla 4 þar sem frávikagreining er leiðrétt og aðlöguð til samanburðar við fjárhagsáætlun og framsetningu fyrri ára.  Eftir aðlögun er heildarrekstrarútkoma málaflokka 21.859,6 mkr. sem er 0,1% undir fjárheimildum sem námu 21.876,4 mkr.  Þótt heildarniðurstaðan sé í fullu samræmi við áætlun er nokkur munur milli málaflokka, því að sumir skila afgangi en aðrir fara fram úr heimildum.  Samkvæmt reglum borgarinnar flyst afgangur eða halli milli ára.  Því verða þeir málaflokkar sem fara fram úr útgjaldaheimildum í ár að takast á við þann vanda með hagræðingu og sparnaði á næsta ári.

 

3.  Skatttekjur, afkoma og efnahagur

 

Skatttekjur voru í fjárhagsáætlun áætlaðar 27.204 mkr. en niðurstaðan varð 428 mkr. lægri eða 26.776 mkr.  Skýringin er sú að tekjur af fasteignagjöldum voru ofáætlaðar en óvissa var varðandi þann þátt vegna almenns endurmats eigna hjá Fasteignamati ríkisins.  Rekstrarafkoma Reykjavíkurborgar (A- og B-hluta) var jákvæð um 2.496,6 mkr.  Rekstrartekjur ársins voru fyrir samantekinn A- og B-hluta 48.602,0 mkr. og rekstrargjöld 51.877,9 mkr. en hreinar fjármunatekjur voru 3.306,6 mkr.  Eigið fé Reykjavíkurborgar í áslok nam 86.604,7 mkr.  Handbært fé frá rekstri Reykjavíkurborgar (A- og B-hluta) samkvæmt yfirliti um sjóðstreymi nam 6.231,0 mkr. eða 13% af rekstrartekjum en hefði að óbreyttum reikningsskilum verið 13.7%.  Handbært fé frá rekstri A-hlutans var 11,9% af skatttekjum en hefði að óbreyttum reikningsskilum verið 13,5%.   Fjárfestingarhreyfingar voru samtals 16.181,9 mkr. og var þeim mætt með framlagi frá rekstri og nýjum langtímalánum.

 

4. Skuldir

 

Skuldir A-hluta voru í árslok 18.539 mkr og hækkuðu um 3.046 mkr. milli ára.  Skýringa er einkum að leita í breyttum reikningsskilareglum en samkvæmt þeim eru  orlofsskuldbindingar að fjárhæð 845 mkr. nú færðar til skuldar, en voru áður utan efnahags. Það á einnig við um skuldbindingar vegna skautahallarinnar í Laugardal og vegna áhorfendastúku á Laugardalsvelli, samtals að fjárhæð 260 mkr.  Þá eru nú færðar til skuldar fyrirfram innheimtar tekjur vegna gatnagerðargjalda og framlag úr Jöfnunarsjóði vegna skólabygginga að fjárhæð 1.081 mkr. sem áður voru færðar til lækkunar á fjárfestingakostnaði ársins. Á árinu 2002 fjárfesti skipulagssjóður í lóðum og löndum fyrir 1.900 mkr. sem að hluta til var fjármagnað með lánum.

 

Samanteknar skuldir A-og B-hluta voru í árslok 57.111 mkr. og hækkuðu um 9.646 mkr.  Helstu skýringar auk skýringa við A-hluta eru þær að Orkuveitan hefur gert upp lífeyrisskuldbindingu sína gagnvart Lífeyrissjóði starfsmanna Reykjavíkurborgar og hækkar það langtímaskuldir um 2.742 mkr.  Vegna framkvæmda og annarra fjárfestinga hækka skuldir Orkuveitunnar um 1.500 mkr., hjá Reykjavíkurhöfn um 800 mkr. og hjá Slökkviliði höfuðborgarsvæðisins um 300 mkr.  Þá hækka skuldir um 700 mkr. hjá Félagsbústöðum vegna kaupa á félagslegur leiguhúsnæði.