Dótturfélag Dagsbrúnar, Daybreak Acquisitions Limited (Daybreak), hefur gert öllum hluthöfum í breska prent- og samskiptafyrirtækinu Wyndeham Press Group (Wyndeham) yfirtökutilboð á 155 pens á hlut. Samkvæmt tilboðinu er fyrirtækið metið á um 80,6 milljónir punda. Meðfylgjandi er opinber tilkynning sem birt var í Kauphöllinni í London (LSE) varðandi yfirtökutilboðið.

 

Helstu atriði varðandi  yfirtökutilboðið:

·    Tilboðsgengi er 155 pens á hvern hlut í Wyndeham.

·    Stjórn Wyndeham hefur einróma samþykkt yfirtökutilboðið og mun mæla með því við hluthafa í Wyndeham að þeir samþykki það.

·    Tilboðsfjárhæð er alls 80,6 milljónir punda (ISK 10,034 milljarðar)

·    Hluthafar hafa frest til 14. apríl 2006 til að samþykkja tilboðið, nema tilboðsfrestur verði framlengdur.

·    Yfirtökutilboðið er háð eftirfarandi skilyrðum:

o         Gild samþykki fáist fyrir a.m.k. 90% af nafnverði hlutafjár í Wyndeham.

o         Að bresk samkeppnisyfirvöld geri ekki athugasemdir við tilboðið.

o         Önnur skilyrði sem gilda almennt um yfirtökutilboð í bresk almenningshlutafélög.

 

Daybreak á, eða hefur fengið skuldbindandi samþykki frá eigendum 20,3 % alls útgefins hlutafjár í Wyndeham, um að þeir muni taka yfirtökutilboði Daybreak.

 

Landsbankinn og Teather & Greenwood hafa umsjón með yfirtökutilboðinu fyrir hönd Daybreak Acquisitions Limited, dótturfélags Dagsbrúnar hf.

 

“Tilboðið í Wyndeham er jákvætt skref fyrir Dagsbrún af þremur ástæðum. Í fyrsta lagi er Wyndeham góð fjárfesting í ljósi langrar sögu af arðsemi og vexti. Fyrirtækið hefur leiðandi stöðu á markaði meðal annars vegna góðra viðskiptatengsla við meirihluta tímaritaútgefanda í Bretlandi. Í öðru lagi fellur Wyndeham mjög vel að starfsemi Dagsbrúnar og munu kaupin færa Dagsbrún ýmsan ávinning, meðal annars áhættudreifing sem felur í sér að hluti af tekjum Dagsbrúnar mun nú koma erlendis frá. Í þriðja lagi, munu kaupin veita okkur sterka fótfestu í Bretlandi, þar sem við munum geta þróað enn frekar starfsemi félagsins,” sagði Þórdís Sigurðardóttir, stjórnarformaður Dagsbrúnar.

 

“Yfirtökutilboðið endurspeglar sanngjarnt verð fyrir hluthafa og veitir þeim tækifæri til að uppskera hærra verð en það sem fengist hefur í viðskiptum með bréf í Wyndeham á markaði á tímum sífelldra breytinga í atvinnugreininni. Ég og stjórnendur Wyndeham teljum að sem hluti af Dagsbrún muni Wyndeham njóta aukins stöðugleika og aðgangs að fjármagni og þekkingu sem mun gera félaginu kleift að efla vöxt og frekari framþróun til hagsbóta fyrir starfsmenn, viðskiptavini og aðra hagsmunaaðila,” sagði Bryan Bedson, stjórnarformaður Wyndeham.

 

Um Dagsbrún

Dagsbrún hefur síðastliðin fimm ár byggt upp umfangsmikla starfsemi í fjölmiðlun, afþreyingu, fjarskiptum, prentun og tengdum greinum á Íslandi og Færeyjum, bæði í gegnum innri vöxt og með kaupum á öðrum fyrirtækjum. Stjórn Dagsbrúnar hefur markað þá stefnu að víkka þessa kjarnastarfsemi félagsins út fyrir heimamarkaðinn og er yfirtökutilboðið í Wyndeham eitt af fyrstu stóru skrefunum í þá átt.

 

Dagsbrún hefur aðsetur í Reykjavík og hefur verið skráð á aðallista Kauphallar Íslands frá júní 2001. Núverandi markaðsverð samstæðunnar er um 34,95 milljarðar.

 

 

Um Wyndeham

Wyndeham er eitt af stærstu prentfyrirtækjum í Bretlandi sem býður m.a. upp á víðtækar prentlausnir fyrir útgefendur, auglýsendur og markpóst. Wyndeham var stofnað árið 1991 og varð, í kjölfar fjölmargra sameininga og fjárfestinga, að einu fremsta  fyrirtæki á sviði prentlausna í Bretlandi. Samstæðan nær til 14 staða víða um Bretland og býður upp á samþættar heildarlausnir fyrir viðskiptavini, allt frá hönnun, vörumerkjastjórum og forvinnu auk heildrænna stafrænna prentlausna.

 

Wyndeham er einn af leiðandi aðilum í prentun á gæðatímaritum í Bretlandi og prentar yfir 600 titla í hverjum mánuði, auk þess að framleiða úrval prentvara, s.s. bæklinga og markpóst fyrir stóran hóp viðskiptavina. Meðal viðskiptavina eru verslanakeðjur, fjármálastofnanir, ferðaiðnaðurinn, bílaframleiðendur, ríkið og opinberar stofnanir.

 

Fyrirtækið var skráð í bresku kauphöllina 1991 og hefur frá því stækkað með innri vexti og yfirtökum á öðrum félögum. Wyndeham er í dag eitt af leiðandi prent- og samskiptafyrirtækjum Bretlands.

 

Velta Wyndeham var 141,3 milljónir punda fyrir reikningsárið sem lauk 31. mars 2005, EBITDA var 19,8 milljónir punda og hagnaður fyrir skatta var 5,7 milljónir. Fjárfestingar í varanlegum rekstrarfjármunum námu 3.3 milljónum á tímabilinu.

 

 

Nánari upplýsingar veita:

 

Fyrir hönd Dagsbrúnar:

Þórdís Sigurðardóttir, stjórnarformaður Dagsbrúnar, sími +354 660 0067

Gunnar Smári Egilsson, forstjóri Dagsbrúnar, sími +354 821 7515

 

Fyrir hönd Wyndeham:

Bryan Bedson, stjórnarformaður Wyndeham, sími +44 127 377 1123

Paul Utting, forstjóri Wyndeham, sími +44 127 377 1123