Fréttatilkynning frá Hf. Eimskipafélagi Íslands, Sjóvá – Almennum tryggingum hf. og Kaupþingi Búnaðarbanka hf.

 

                Reykjavík, 5. ágúst 2003

 

Steinhólar ehf. eignast yfir 90% í Skeljungi hf.

 

Tilboð til hluthafa væntanlegt

 

Eignarhaldsfélagið Steinhólar ehf. hefur eignast yfir 90% af virkum eignarhlut í Skeljungi og mun á næstunni gera öllum hluthöfum Skeljungs tilboð þar sem boðist verður til að innleysa hluti þeirra á genginu 15,9. Að Steinhólum standa dótturfélag Eimskipafélags Íslands, Burðarás (með 25% hlut), Sjóvá-Almennar tryggingar (25%) og Kaupþing Búnaðarbanki (50%). Þessir hluthafar munu standa saman að rekstri Skeljungs og áforma að selja þær eignir félagsins sem ekki tengjast kjarnastarfsemi þess.

 

Burðarás, Sjóvá-Almennar tryggingar og Kaupþing Búnaðarbanki hafa gert með sér samkomulag um að selja alla eignarhluti sína í Skeljungi til Steinhóla ehf. á genginu 15,9 krónur fyrir hvern hlut. Burðarás selur 176.351.072 hluti (23,35%), Sjóvá-Almennar tryggingar selja 189.005.625 hluti (25,02%) og Kaupþing Búnaðarbanki selur 299.287.701 hluti (39,62%). Þá hafa Steinhólar ehf. tryggt sér kaup á 8.575.354 hlutum til viðbótar. Steinhólar ehf. fara því með samtals 673.219.752 hluti í Skeljungi eða sem nemur 90,7% af atkvæðamagni félagsins.

 

Samhliða framangreindum viðskiptum mun Burðarás kaupa alla hluti Skeljungs í Eimskipafélagi Íslands og Sjóvá – Almennar tryggingar  munu kaupa hluti Skeljungs í Sjóvá – Almennum tryggingum og Flugleiðum. Auk þess stefna yfirtökuaðilar að því að selja aðrar eignir sem ekki tengjast kjarnastarfsemi Skeljungs.

 

Steinhólar ehf. munu á næstunni gera öllum hluthöfum Skeljungs tilboð um að kaupa hluti þeirra á genginu 15,9, sem er hæsta verð sem aðilar hafa greitt í viðskiptum sínum með bréf í Skeljungi á síðustu sex mánuðum og beita sér samhliða fyrir því að innlausnarréttur gagnvart hluthöfum verði nýttur. Stefnt er að því að afskrá hlutabréf Skeljungs úr Kauphöll Íslands.

 

Hluthafar Steinhóla ehf. hafa gagnkvæman kauprétt hver á hlutum annars í Steinhólum ehf. Jafnframt eiga Burðarás og Sjóvá-Almennar tryggingar sölurétt á hlutum sínum í Steinhólum ehf. gagnvart Kaupþingi Búnaðarbanka hf.

 

Eftirtaldir aðilar teljast innherjar vegna viðskipta með hlutabréf Skeljungs: Benedikt Jóhannesson er stjórnarformaður Burðaráss og Skeljungs, Friðrik Jóhannsson er framkvæmdastjóri Burðaráss og varamaður í stjórn Skeljungs, Hörður Sigurgestsson situr í stjórn Burðaráss og Skeljungs og Kristinn Björnsson forstjóri Skeljungs er stjórnarmaður í Sjóvá-Almennum tryggingum. Guðný Björnsdóttir, lögfræðingur hjá Sjóvá-Almennum tryggingum situr í stjórn Skeljungs.

 

Ráðgjöf og umsjón vegna framkvæmdar verkefnisins er í höndum Fyrirtækjaráðgjafar Kaupþings Búnaðarbanka.

 

Nánari upplýsingar veitir:

Hreiðar Már Sigurðsson, forstjóri Kaupþings Búnaðarbanka, í síma 525-6108

Einar Sveinsson, forstjóri Sjóvá–Almennra trygginga, í síma 569-2602

Ingimundur Sigurpálsson, forstjóri Eimskipafélags Íslands, í síma 525-7102