Hf. Eimskipafélag Íslands hefur aukið hlut sinn í Skagstrendingi hf. með kaupum á öllum hlutabréfum Höfðahrepps, Nafta og Tryggingamiðstöðvarinnar og á nú 83,83% hlutafjár í Skagstrendingi.  Kaupverð hlutabréfanna í Skagstrendingi hf. er miðað við gengið 7,2 og er kaupverðið samtals 1.051 milljónir króna. Eimskipafélagið greiðir  fyrir þessi hlutabréf með  eigin hlutabréfum að nafnverði 191 milljón króna en það jafngildir genginu 5,5.

 

Í framhaldi af þessum viðskiptum mun Hf. Eimskipafélag Íslands gera öðrum hluthöfum í Skagstrendingi yfirtökutilboð í samræmi við lög númer 34/1998.  Stefnt er að sameiningu Skagstrendings og Útgerðarfélags Akureyringa þannig að þau verði formlega hluti af sjávarútvegsstarfsemi Eimskipafélagsins. 

 

Í mars síðast liðnum keypti Hf. Eimskipafélag Íslands af Búnaðarbanka Íslands hlutabréf í Skagstrendingi og Útgerðarfélagi Akureyringa og átti eftir þau kaup 40,7% hlut í Skagstrendingi en 55,3% hlut í ÚA.  Í framhaldi af því var gert yfirtökutilboð í hlutabréf annarra hluthafa í Útgerðarfélaginu og varð niðurstaðan sú að yfirgnæfandi meirihluti hluthafa í ÚA ákvað að taka tilboðinu og á Eimskipafélagið nú 97,5% í Útgerðarfélagi Akureyringa. 

 

Hf. Eimskipafélag Íslands byggir nú á þremur megin stoðum, flutningastarfsemi, sjávarútvegsstarfsemi og fjárfestingastarfsemi.  Þessar einingar verða reknar sem sjálfstæð félög innan samstæðunnar og munu starfa með sjálfstæða stjórn, sem marka mun skýra stefnu og áherslu, hver á sínu sviði.

Sjávarútvegur er undirstöðuatvinnugrein á Íslandi og því er mikilvægt að hafa framsækin, öflug og leiðandi fyrirtæki sem geta stuðlað að aukinni hagkvæmni og útrás í sjávarútvegi. Þetta er ekki síst mikilvægt fyrir atvinnulíf utan höfuðborgarsvæðisins.  Kaup á hlutabréfum í Skagstrendingi er liður í því að byggja upp og reka öflugt sjávarútvegsfyrirtæki á alþjóðlegan mælikvarða innan samstæðu Hf. Eimskipafélags Íslands.