Þær
tillögur sem lagðar voru fyrir aðalfund Icelandic Group hf. föstudaginn 23.
mars 2007 voru samþykktar samhljóða.
1.
Eftirfarandi tillaga um ráðstöfun taps síðastliðins
rekstrarárs var samþykkt:
Stjórn
Icelandic Group hf. gerir að tillögu sinni að, aðalfundur haldinn 23. mars
2007, samþykki að ekki verði greiddur út arður til hluthafa og að tap síðasta rekstrarárs
verði fært til lækkunar á eigin fé félagsins.
2.
Eftirfarandi tillaga um þóknun til stjórnarmanna
fyrir næsta kjörtímabil var samþykkt:
Aðalfundur
Icelandic Group hf. haldinn 23. mars 2007 samþykkir að stjórnarlaun vegna
ársins 2007 verði óbreytt og verða þau sem hér segir:
Stjórnarformaður kr. 200.000 á mánuði
en aðrir stjórnarmenn kr. 100.000 á mánuði.
Varastjórnarmenn kr. 30.000 fyrir
hvern fund sem þeir sitja, en þó að hámarki kr. 100.000 á mánuði.
3.
Eftirtaldir aðilar voru kjörnir í stjórn félagsins
til eins árs:
Aðalsteinn Helgason
Baldur Guðnason
Guðmundur P. Davíðsson
Magnús Þorsteinsson
Steingrímur H. Pétursson
Varamenn
Páll Magnússon
Stefán Ágúst Magnússon
4.
Eftirfarandi tillaga félagsstjórnar um
endurskoðunarfélag fyrir tímabilið var samþykkt:
Lagt
er til að KPMG hf., kr. 590975-0449, Borgartúni 27, 105 Reykjavík, verði endurkjörið endurskoðunarfélag Icelandic
Group hf. fyrir árið 2007.
5.
Eftirfarandi tillaga um starfskjarastefnu var
samþykkt:
Starfskjarastefna Icelandic Group hf.
1. gr. Markmið
Markmið starfskjarastefnu þessarar er
að gera starf hjá Icelandic Group hf. að eftirsóknarverðum kosti fyrir fyrsta
flokks starfsfólk og þar með tryggja félaginu stöðu í fremstu röð á
alþjóðavettvangi. Til að svo megi verða er nauðsynlegt að stjórn félagsins sé
kleift að bjóða samkeppnishæf laun og aðrar greiðslur s.s. kaupauka og
kauprétti á alþjóða mælikvarða.
2. gr. Starfskjaranefnd
Starfskjaranefnd skal skipuð þremur
mönnum sem stjórn félagsins kýs úr sínum röðum. Nefndin starfar samkvæmt
sérstöku erindisbréfi.
Hlutverk starfskjaranefndar er að
vera leiðbeinandi fyrir félagsstjórn og framkvæmdastjórn um starfskjör æðstu
stjórnenda félagsins og ráðgefandi um starfskjarastefnu. Skal nefndin jafnframt
fylgjast með að starfskjör æðstu stjórnenda séu innan ramma
starfskjarastefnunnar og gefa félagsstjórn skýrslu þar um árlega í tengslum við
aðalfund félagsins.
3. gr. Starfskjör stjórnarmanna
Stjórnarmönnum skal greidd föst
mánaðarleg þóknun í samræmi við ákvörðun aðalfundar ár hvert, svo sem kveðið er
á um í 79. gr. laga um hlutafélög. Gerir stjórnin tillögu um þóknunina fyrir
komandi starfsár og skal í þeim efnum taka mið af þeim tíma sem stjórnarmenn
verja til starfans, þeirri ábyrgð sem á þeim hvílir, og afkomu félagsins.
Stjórnarmenn skulu fá fasta þóknun
fyrir hvern fund sem þeir sitja í undirnefndum stjórnar og skal sú þóknun
ákveðin af aðalfundi félagsins.
4. gr. Starfskjör forstjóra
Gera skal skriflegan ráðningarsamning
við forstjóra. Kjör hans skul ávallt vera samkeppnishæf á alþjóðamarkaði.
Fjárhæð grunnlauna og annarra
greiðslna til forstjóra skal taka mið af menntun, reynslu og fyrri störfum.
Tilgreina skal önnur starfskjör í ráðningarsamningnum, svo sem greiðslur í
lífeyrissjóð, orlof, hlunnindi og uppsagnarfrest. Heimilt er að semja við
forstjóra um upphafsgreiðslu vegna ráðningar hans að félaginu.
Við ákvörðun uppsagnarfrests í
ráðningarsamningi má hafa sérstök ákvæði um að uppsagnarfrestur skuli lengjast
í hlutfalli við starfstíma forstjóra. Jafnframt skal, í ráðningarsamningi, geta
um skilyrði uppsagnar forstjóra.
Endurskoða skal grunnlaun forstjóra
árlega og skal við slíka endurskoðun höfð hliðsjón af mati starfskjaranefndar á
frammistöðu forstjóra, þróun launakjara almennt í sambærilegum fyrirtækjum og
afkomu félagsins.
Við gerð ráðningarsamnings við
forstjóra skal haft að leiðarljósi að ekki komi til frekari greiðslna við
starfslok en fram koma í ráðningarsamningi. Heimilt er þó við sérstök skilyrði
að mati starfskjaranefndar að gera sérstakan starfslokasamning við starfslok
forstjóra.
5. gr. Starfskjör framkvæmdastjóra
Forstjóri ræður framkvæmdastjóra
félagsins í samráði við stjórn félagsins. Við ákvörðun starfskjara
framkvæmdastjóra gilda sömu sjónarmið og rakin eru í 4. gr.
6. gr. Umbun til æðstu stjórnenda
Starfskjaranefnd er heimilt að leggja
fram tillögu fyrir stjórn félagsins um að umbuna æðstu stjórnendum til viðbótar
grunnlaunum í formi afhendingar hluta, árangurstengdra greiðslna, hlutabréfa,
kaupréttar, forkaupsréttar og annars konar greiðslna sem tengdar eru
hlutabréfum í félaginu eða þróun verðs á hlutabréfum í félaginu,
lífeyrissamninga og starfslokasamninga.
Við ákvörðun um hvort veita skuli
æðstu stjórnendum umbun til viðbótar grunnlaunum skal taka mið af stöðu,
ábyrgð, frammistöðu og framtíðarmöguleikum viðkomandi stjórnanda innan
félagsins.
Við veitingu kaupréttar að hlutum í
félaginu skal litið til sambærilegra samninga sem áður hafa verið veittir
viðkomandi, hvort sem rétturinn hefur verið nýttur eða ekki. Kaupréttur skal að
jafnaði einungis nýtanlegur að þeir sem gert hafa slíka samninga séu í vinnu
hjá félaginu þá er kauprétturinn kemur til framkvæmda.
7. gr. Aðrir starfsmenn
Við ákvörðun starfskjara annarra
starfsmanna skulu framkvæmdastjórar einstakra sviða taka mið af ofangreindum
reglum eftir því sem við á.
8. gr. Upplýsingagjöf
Á aðalfundi skal stjórn gera grein
fyrir kjörum forstjóra, framkvæmdastjóra og stjórnarmanna. Upplýsa skal um
heildarfjárhæð greiddra launa á árinu, greiðslur frá öðrum félögum í sömu
fyrirtækjasamstæðu, fjárhæð kaupauka og kaupréttar, annars konar greiðslur sem
tengjast hlutabréfum í félaginu, starfslokagreiðslur ef einhverjar eru, auk
heildarfjárhæðar annarra greiðslna.
9. gr. Samþykkt starfskjarastefnu og fleira
Starfskjarastefna félagsins skal
tekin til afgreiðslu á aðalfundi og skal hún tekin til endurskoðunar ár hvert
og borin undir aðalfund til samþykktar eða synjunar.
Er starfskjarastefnan bindandi fyrir
stjórn félagsins að því er varðar ákvæði um kaupréttarsamninga og hvers konar
samninga eða greiðslur er fylgja þróun verðs á hlutabréfum í félaginu, sbr. 2.
mgr. 79. gr. a. hlutafélagalaga. Að öðru leiti er starfskjarastefnan leiðbeinandi
fyrir félagið og stjórn þess. Stjórn félagsins skal færa til bókar í
fundargerðarbók veigamikil frávik frá starfskjarastefnunni og skulu þau frávik
studd greinargóðum rökum. Gera skal grein fyrir frávikum á næsta aðalfundi
félagsins.
Greinargerð með starfskjarastefnu Icelandic Group hf.
Með lögum nr. 89/2006 var m.a. gerð
sú breyting á hlutafélagalögum að grein 79 a. var bætt inn í lögin. Greinin
leggur þá skyldu á stjórn Icelandic Group hf. að leggja starfskjarastefnu fyrir
aðalfund félagsins til samþykktar eða synjunar. Skal starfskjarastefnan mæla
fyrir um laun og aðrar greiðslur til forstjóra og annarra æðstu stjórnenda
félagsins, svo og stjórnarmanna þess. Segir í lögunum að í starfskjarastefnu
skuli koma fram grundvallaratriði varðandi starfskjör stjórnenda og
stjórnarmanna og stefnu félagsins varðandi samninga við stjórnendur og
stjórnarmenn. Jafnframt skal koma þar fram hvort og þá við hvaða aðstæður og
innan hvaða ramma heimilt sé að greiða eða umbuna stjórnendum og stjórnarmönnum
til viðbótar grunnlaunum þeirra og þá meðal annars í formi afhendingar hluta,
árangurstengdra greiðslna, hlutabréfa, kaup- og söluréttar, forkaupsréttar og
annars konar greiðslna sem tengdar eru hlutabréfum í félaginu eða þróun verðs á
þeim, lánasamninga, lífeyrissamninga og starfslokasamninga.
Var umrædd lagabreyting gerð vegna
tilmæla Framkvæmdastjórnar Evrópubandalagsins 2004/913/EB frá 14. desember 2004
um að stuðla að viðeigandi fyrirkomulagi að því varðar starfskjör stjórnenda í
hlutafélögum sem eru skráð í kauphöll.
Stjórn Icelandic Group hf. hefur það
að markmiði með tillögu að starfskjarastefnu, sem hér er lögð fyrir aðalfund
félagsins, að marka félaginu raunhæfa starfskjarastefnu sem gerir félaginu fært
að laða til sín stjórnendur í fremstu röð og tryggja þar með samkeppnishæfni
félagsins á alþjóðlegum vettvangi.
6.
Eftirfarandi tillögur um breytingar á samþykktum
félagsins voru samþykktar:
Tillaga
um nýjar samþykktir félagsins sem fylgja með tillögum þessum. Einkum er um
að ræða endurröðun greina og breytingar á orðalagi samþykkta, en hinar nýju
samþykktir fela í sér eftirfarandi
efnisbreytingar:
A.
Grein 4:
Varðar rafræna
þátttöku í hluthafafundum og rafræna hluthafafundi.
Breytingarnar
er að finna í ákvæðum greina 4.2-4.8, sem hljóða svo:
“Rétt til setu á hluthafafundum
hafa hluthafar, umboðsmenn hluthafa, endurskoðendur félagsins og forstjóri,
þótt ekki sé hluthafi. Þá getur stjórnin
boðið sérfræðingum setu á einstökum fundum, ef leita þarf álits þeirra eða
aðstoðar.
Stjórn er heimilt að ákveða að
hluthafar geti tekið þátt í fundarstörfum hluthafafunda með rafrænum hætti án
þess að vera á fundarstað. Telji stjórn að tiltækur sé nægilega öruggur búnaður
til að gefa hluthöfum kost á að taka þátt í fundarstörfum með rafrænum hætti án
þess að vera á fundarstað og ákveði stjórn að nýta þessa heimild skal þess
sérstaklega getið í fundarboði.
Hluthafar sem hyggjast nýta sér
rafræna þátttöku skulu tilkynna skrifstofu félagsins þar um með 5 daga
fyrirvara og leggja þar fram skriflegar spurningar varðandi dagskrá eða
framlögð skjöl sem þeir óska svara við á fundinum.
Hluthafar skulu hafa aðgengi að
leiðbeiningum um þátttöku í hluthafafundi með rafrænum hætti ásamt aðgangsorði
og nauðsynlegum hugbúnaði til slíkrar þátttöku. Jafngildir innslegið aðgangsorð
í tölvuforrit undirskrift viðkomandi hluthafa og telst viðurkenning á þátttöku
hans í hluthafafundinum.
Stjórn
er heimilt að ákveða að hluthafafundur verði aðeins haldinn rafrænt.
Telji
stjórnin gerlegt að halda fundinn algjörlega rafrænt með viðeigandi búnaði og
gefa hluthöfum þannig kost á þátttöku í fundarstörfum og atkvæðagreiðslu skal í
fundarboði koma fram upplýsingar um tæknibúnað auk upplýsinga um það hvernig
hluthafar tilkynni um rafræna þátttöku sína og hvar þeir nálgist upplýsingar,
leiðbeiningar og aðgangsorð til þátttöku
í fundinum. Jafngildir innslegið aðgangsorð í tölvuforrit undirskrift
viðkomandi hluthafa og telst viðurkenning á þátttöku hans í hluthafafundinum.
Ef
stjórn telur ekki framkvæmanlegt að gefa hluthöfum kost á þátttöku í
hluthafafundi rafrænt skal hluthöfum gefinn kostur á að greiða atkvæði um
tillögur eða taka þátt í kosningum bréflega. Setur stjórn reglur um framkvæmd
slíkrar kosningar.”
B.
Grein 4.13:
Um að á
dagskrá aðalfundar verði, auk núverandi aðalfundarstarfa, tillögur um
starfskjarastefnu.
Við bætist nýr
liður sem 4. liður og hljóðar hann svo:
“Tillögur félagsstjórnar um starfskjarastefnu.”
C.
Grein 4.17:
Varðar
styttingu frests til boðunar hluthafafundar úr tveimur vikum hið skemmsta í
eina viku hið skemmsta.
Hljóðar grein
4.17 svo:
“Hluthafafundir
skulu boðaðir með skemmst einnar viku fyrirvara en lengst fjögurra vikna
fyrirvara. Æskilegt er að aðalfundur verði boðaður með tveggja vikna fyrirvara
telji stjórn félagsins það mögulegt en heimilt er að boða fundinn með einnar
viku fyrirvara.”
D.
Grein 5:
Varðar
upplýsingar um framboðstilkynningu þeirra sem gefa kost á sér til stjórnarsetu.
Hljóða ákvæði
5. gr. um framboð til félagsstjórnar svo:
“Þeir sem hyggjast kost á sér til
stjórnarkjörs skulu tilkynna félagsstjórn um framboð sitt skemmst 5 dögum fyrir
hluthafafund. Í tilkynningu um framboð til stjórnar skal gefa, auk nafns
frambjóðanda, kennitölu og heimilisfangs, upplýsingar um aðalstarf, önnur
stjórnarstörf, menntun, reynslu og hlutafjáreign í félaginu. Þá skal einnig
upplýsa um hagsmunatengsl við helstu viðskiptaaðila og samkeppnisaðila
félagsins, sem og hluthafa sem eiga meira en 10% hlut í félaginu.
Félagsstjórn skal fara yfir
framboðstilkynningar og gefa hlutaðeigandi, með sannanlegum hætti, kost á því
að bæta úr þeim göllum sem eru á tilkynningunni innan tiltekins frests. Ef ekki
er bætt úr göllum á framboðstilkynningunni frestsins, úrskurðar félagsstjórn um
gildi framboðs. Unnt er að skjóta niðurstöðu félagsstjórnar til hluthafafundar
sem fer með endanlegt úrskurðarvald um gildi framboðs.
Upplýsingar um frambjóðendur til stjórnar skulu lagðar
fram hluthöfum til sýnis á skrifstofu félagsins eigi síðar en 2 dögum fyrir
hluthafafund.”
E.
Grein 15:
Varðar heimild
félagsins til lántöku með sérstökum skilyrðum.
Stjórn Icelandic Group hf. leggur
fyrir aðalfund eftirfarandi tillögu um heimild stjórnar félagsins til að taka
víkjandi lán með sérstökum skilyrðum er veitir lánardrottni rétt til þess að
breyta kröfu sinni á hendur félaginu í hluti í því skv. VI. kafla
hlutafélagalaga nr. 2/1995.
Lánið verði víkjandi og víki fyrir öllum
öðrum kröfum á hendur lántaka nema kröfu um endurgreiðslu hlutafjár.
Þá felst í tillögunni heimild til hlutafjárhækkunar
um allt að kr. 5.000.000.000 og verði stjórn félagsins heimilað samkvæmt 48.
gr. hlutafélagalaga að breyta 2. gr. samþykkta félagsins til samræmis við þá
hlutafjárhækkun sem leiða kann af breytingu lánsins í hluti í félaginu.
Tillaga stjórnarinnar er
svohljóðandi:
“Aðalfundur Icelandic Group hf., sem haldinn er þann 23. mars 2007,
samþykkir, með vísan til VI. kafla hlutafélagalaga, einkum 48. gr., að veita
stjórn félagsins heimild til að taka lán er veitir lánardrottni rétt til þess
að breyta kröfu sinni á hendur félaginu í hluti í því. Skal félaginu heimilt að
gefa út skuldaskjöl að fjárhæð allt að kr. 5.000.000.000 eða samsvarandi fjárhæð
í evrum og skal lánstíminn vera allt að 5 ár. Skuldin ber ársvexti sem skulu
vera REIBOR að viðlögðu 5% vaxtaálagi. Þó skulu vextir vera LIBOR að viðlögðu
5% vaxtaálagi ef fjárhæð lánsins er í evrum. Vextir skulu greiðast árlega, í
fyrsta sinn hinn 31. desember 2007. Á gjalddaga vaxta greiðist helmingur áfallinna
en ógreiddra vaxta, en hinn helmingurinn leggst við höfuðstól og kemur til
uppgjörs á greiðsludegi, sem skal vera 31. desember 2011. Skal við útreikning
vaxta leggja til grundvallar höfuðstól að viðbættum vöxtum sem leggja ber við
höfuðstól skv. framansögðu.
Lán þetta er víkjandi og víkur
fyrir öllum öðrum kröfum á hendur lántaka nema kröfu um endurgreiðslu
hlutafjár. Við gjaldþrot eða slit lántaka endurgreiðist lánið á eftir öllum
almennum kröfum en á undan kröfum til endurgreiðslu hlutafjár.
Á tímabilinu
frá 1. desember 2011 til 31. desember 2011 er lánveitanda heimilt að breyta
höfuðstól skuldarinnar að viðbættum vöxtum í hluti í Icelandic Group hf. Á sama
hátt getur lánveitandi, á vaxtagjalddögum (í fyrsta sinn hinn 31. desember
2007), breytt öllu láninu eða hluta þess, þó að lágmarki 20% af höfuðstól
skuldarinnar ásamt áföllnum vöxtum í hlutafé.
Lánveitanda er
ennfremur heimilt að breyta höfuðstól skuldarinnar að viðbættum vöxtum í hluti
í Icelandic Group hf. áður en ráðstafanir félagsins eða sem tengjast félaginu,
s.s. hækkun eða lækkun hlutafjár, frekari skuldbindingar samkvæmt breytanlegum
lánum, útgáfa áskriftarréttinda, arðsúthlutun og/eða annars konar úthlutun á
fjármunum félagsins til hluthafa á sér stað. Lánveitanda skal tilkynnt um
slíkar fyrirhugaðar aðgerðir með nægum fyrirvara til að hann geti nýtt sér
þennan rétt sinn.
Með fyrirvara
um umreiknun breytigengis samkvæmt neðangreindu skal gengi hluta við nýtingu
breytiréttar vera kr. 7,30 á hlut.
Kjósi
lánveitandi að breyta skuld sinni í hluti í Icelandic Group hf. skal hann
tilkynna félaginu það skriflega. Skal stjórn félagsins, eins fljótt og kostur
er, gefa út hlutabréf í Icelandic Group hf. til lánveitanda honum að
kostnaðarlausu til þess að fullnægja breytiréttinum.
Sé skuldinni
breytt í hluti í Icelandic Group hf. telst fullnaðaruppgjör hafa farið fram
þegar lántaki hefur gefið út nýja hluti í Icelandic Group hf. á nafn lántakanda.
Hlutabréf eru gefin út með rafrænum hætti í samræmi við grein 2.6 í samþykktum
félagsins og telst félagið hafa fullnægt skyldum sínum þegar hlutabréfin hafa
verið færð í tölvukerfi Verðbréfaskráningar Íslands á kennitölu lánveitanda.
Tryggt skal í skilmálum lánsins að einstakar ráðstafanir félagsins eða sem
tengjast félaginu, s.s. hækkun eða lækkun hlutafjár, frekari skuldbindingar
samkvæmt breytanlegum lánum, útgáfa áskriftarréttinda, arðsúthlutun og/eða
annars konar úthlutun á fjármunum félagsins til hluthafa hafi ekki áhrif á
verðmæti breytiréttarins. Þannig skal breytigengið endurreiknað og uppfært í
slíkum tilvikum með þeim hætti að það breytist í réttu hlutfalli við þær breytingar
sem verða á verði og/eða verðmæti hluta í félaginu vegna slíkra ráðstafana,
allt með það að markmiði að verðmæti breytiréttarins minnki ekki. Skal nánari
útfærsla slíkrar uppfærslu breytigengisins koma fram í skuldaskjölum þeim sem
stjórn félagsins gerir við einstaka lánveitendur og hefur stjórn félagsins
fulla heimild til að semja um nánari skilmála slíkrar útfærslu við
lánveitendur. Félagsstjórn hefur samhliða heimild til að breyta samþykktum
félagsins þannig að endanleg útfærsla uppfærslunnar komi skýrlega fram í
samþykktum félagsins.
Ef hlutafé lántaka verður hækkað á lánstímanum hefur lánveitandi ekki rétt
til forgangs að nýjum hlutum. Skal lánveitandi að öðru leyti ekki njóta
réttinda sem hluthafi í félaginu fyrr en hann hefur neytt breytiréttar síns og
hinir nýju hlutir hafa verið færðir í tölvukerfi Verðbréfaskráningar Íslands á
kennitölu lánveitanda.
Verði lántaka slitið á lánstímanum, þ.m.t. við samruna eða skiptingu, áður
en láninu hefur verið breytt í hlutafé eða það greitt, skal þess gætt að staða
skuldbindingar samkvæmt láninu verði með þeim hætti að skuldbindingin sé
víkjandi fyrir öðrum skuldum lántaka (en jafnsett öðrum víkjandi lánum sem
tekin verða samkvæmt þessari heimild) en framar stöðu hlutafjár í félaginu.
Að öðru leyti en að framan greinir skal ákvörðun um lækkun hlutafjár í
félaginu, útgáfa breytanlegra skuldabréfa, lána eða áskriftarréttindi ekki hafa
áhrif á réttarstöðu lánveitanda áður en kröfu hans verður breytt í hlutafé.
Skal stjórn félagsins heimilt að hækka hlutafé félagsins um allt að kr. 5.000.000.000
að nafnverði til að efna ofangreinda skuldbindingu. Falla hluthafar frá
forgangsrétti til áskriftar að hlutum sem gefnir verða út skv. þessari heimild.
Hinir nýju hlutir skulu veita réttindi í félaginu frá skráningardegi
hlutafjárhækkunar.
Skal ofangreind heimild stjórnar gilda til 23. mars 2008.”
Verði tillagan samþykkt verður hún
tekin upp í samþykktir félagsins sem grein 15.1, í stað þess ákvæðis sem var í
grein 12.01 í eldri samþykktum félagsins.
Greinargerð.
Tillögur þær
sem gerðar eru um efnisbreytingar á samþykktum eiga sér flestar stoð í
hlutafélagalögum nr. 2/1995, sbr. lög nr. 89/2006. Með fyrirvara um neðangreint
er að öðru leyti einungis um að ræða breytingar á uppröðun og orðalagi
samþykkta í þeim tilangi að gera þær skýrari.
Tillaga sú sem
gerð er um breytingu á ákvæðum 15. gr. samþykktanna (nú grein 12.01) felur í
sér að stjórn félagsins er heimilt að taka lán í nafni félagsins sem heimilar
lánveitanda að breyta fjárhæð lánsins, auk áfallinna vaxta, í hlutafé í
félaginu. Gengið sem notað skal við slíka breytingu skal vera kr. 7,3 á hlut,
en það gengi er þó háð breytingum vegna tiltekinna ráðstafana stjórnar
félagsins og/eða félagsins sjálfs, s.s. hækkunar eða lækkunar hlutafjár,
arðsúthlutunar o.s.frv. Markmiðið er að tryggja að verðmæti breytiréttarins
rýrni ekki vegna slíkra ráðstafana. Nánari útfærsla þeirra breytinga sem orðið
geta á breytigenginu, þ.e. nákvæmari útlistun á þeim aðferðum sem nýttar skulu
við endurreikning breytigengisins, skulu koma fram í skilmálum einstakra
skuldaskjala.
Tillagan felur
í sér breytingu á ákvæði 12.01 í núgildandi samþykktum félagsins sem samþykkt
var á hluthafafundi þann 16. janúar s.l. Eru breytingar einkum þrenns konar. Í
fyrsta lagi felur tillagan í sér að stjórn félagsins er veitt heimild til að
taka breytanlegt lán með nánar tilteknum skilmálum, en ákvæði 12.01 mælir nú
aðeins fyrir um að félaginu sé heimilt að taka slík lán. Í öðru lagi felur
tillagan í sér fyrirmæli um að breytigengið verði endurreiknað vegna tiltekinna
ráðstafana, sbr. ofangreint. Loks felur tillagan í sér að stjórn félagsins er
heimilt að hækka hlutafé félagsins um allt að kr. 5.000.000.000 til að efna
skuldbindingar félagsins samkvæmt hinum breytanlegu lánum, en heimildin
hljóðaði áður upp á kr. 1.100.000.000.
Nánari upplýsingar veitir:
Björgólfur Jóhannsson
Sími 560 7800
Icelandic Group - Samþykktir.pdf