Ársreikningur samstæðu Jarðborana hf. fyrir árið 2005 var lagður fram og staðfestur af stjórn og forstjóra félagsins á stjórnarfundi í dag, mánudaginn 20. febrúar 2006.

Tekjur á árinu 2005 námu 4.515 milljónum króna samanborið við 3.870 milljónir á sama tíma árið áður.  Veltuaukning er því um 16,7%. 

Rekstrarhagnaður fyrir afskriftir og fjármagnsliði (EBITDA) nam 1.180 milljónum króna en var 936 milljónir á sama tíma í fyrra.

Rekstrarhagnaður, EBIT, nam 943 milljónum króna en var 734 milljónir árið áður. Aukning milli ára nemur því 28,4%.

Hagnaður tímabilsins nam 634 milljónum króna samanborið við 458 milljónir á sama tíma árið 2004.   

Hagnaður á hlut var 1,61 króna samanborið við 1,15 krónu árið áður.

Reikningsskilaaðferðum hefur verið breytt til samræmis við alþjóðlega reikningskilastaðla (e. International Financial Reporting Standards).  Samanburðartölum fyrra árs hefur verið breytt til samræmis.

Samstæða Jarðborana samanstendur af fimm félögum, móðurfélaginu Jarðborunum, Iceland Drilling Ltd., Björgun, Einingaverksmiðjunni (hluta ársins) og Byggingafélaginu Húsi. Félögin eru með rekstur á Íslandi, Azoreyjum og í Ungverjalandi.

 

 

Eftirfarandi eru helstu niðurstöður úr ársreikningi Jarðborana

 

Rekstur ársins 2005 í milljónum króna
	2005		2004
Rekstrartekjur	4.515		3.871
Framkvæmdakostnaður	3.228		2.808
Framlegð	1.287		1.063
Annar rekstrarkostnaður	344		328
Rekstrarhagnaður (EBIT)	943		734
Fjármunatekjur og fjármagnsgjöld	(229)		(177)
Hagnaður af sölu dótturfélags	90		0
Hagnaður fyrir skatta	804		558
Skattar	(170)		(99)
Hagnaður	634		458
EBITDA	1.180		936
Hlutfall af tekjum
Framlegð	28,5%		27,5%
Ebitda	26,1%		24,2%
Hagnaður	14,0%		11,8%
Efnahagur í árslok	31.12.2005		31.12.2004
Fastafjármunir	4.206		4.523
Veltufjármunir	4.246		2.795
Eigið fé	2.993		2.636
Skuldir	5.458		4.681
Sjóðstreymi	31.12.2005		31.12.2004
Veltufé frá rekstri	941		782
Handbært fé frá rekstri	1.303		40
Kennitölur í árlok 2005
Arðsemi eigin fjár	26,6%		21,0%
Veltufjárhlutfall	3,4		1,4
Eiginfjárhlutfall	35,4%		35,6%
Hagnaður pr.hlut í krónum	1,61		1,15

 

 

Alþjóðlegir reikningsskilastaðlar, IFRS            

Jarðboranir hafa undirbúið upplýsingakerfi sitt og tekið í notkun alþjóðlega reikningsskilastaðla frá og með árinu 2005. Reikningsskil ársins 2005 hafa verið löguð að þeim breytingum og bókfærðri eiginfjárstöðu í ársbyrjun 2005 breytt til samræmis. 

Við innleiðingu IFRS var einkum breytt mati á birgðum, hlutabréfum og afskriftum rekstrarfjármuna sem höfðu áhrif á efnahag og afkomu félagsins. Heildaráhrif eru þau að hagnaður ársins 2004 verður 458 milljónir króna en var áður birtur 432 milljónir króna. Við breytinguna lækkar eigið fé 1. janúar 2004 um 35 milljónir króna. Hinn 31. desember 2004 verður það 2.636 milljónir króna en var í fyrri reikningsskilum 2.659 milljónir króna.

 

Góð afkoma á árinu 2005

Rekstrartekjur samstæðu Jarðborana á árinu 2005 námu 4.515 milljónum króna, en voru 3.870 milljónir á sama tíma árið á undan og jukust því um 16,7%. Rekstrargjöld fyrirtækisins með afskriftum á tímabilinu voru 3.572 milljónir, borið saman við 3,136 milljónir á sama tíma árið áður og hækkuðu því um 13,9%.

Rekstrarhagnaður samstæðu Jarðborana á árinu 2005, fyrir fjármagnsliði og skatta, nam 943 milljónum króna en var 734 milljónir á sama tíma árið á undan. Fjármagnsgjöld félagsins á árinu voru 229 milljónir króna borið saman við 177 milljónir árið á undan.

Hagnaður fyrir skatta er 804 milljónir króna, samanborið við 558 milljónir á sama tíma árið áður. Reiknaðir skattar voru 170 milljónir borið saman við 99 milljónir árið áður. Hagnaður á árinu 2005 nam því 634 milljónum en var 458 milljónir á árinu 2004. Hagnaðurinn samsvaraði 14% af heildartekjum, samanborið við 11,8% af heildartekjum ársins 2004. Veltufé frá rekstri var 941 milljón króna en var 782 milljónir á sama tíma á fyrra ári. Veltufjárhlutfall er 3,4.

Heildarhlutafé Jarðborana er 400 milljónir króna að nafnverði. Eigið fé var 2.993 milljónir 31. desember s.l. og eiginfjárhlutfall er nú 35,4%. 

Heildareignir félagsins voru 8.452 milljónir króna. Heildarskuldir og skuldbindingar félagsins námu 5.458 milljónum.

Fjárfestingar í varanlegum rekstrarfjármunum námu 383 milljónum króna en voru 928 milljónir króna árið áður.

Rekstur samstæðunnar greinist þannig á ársfjórðunga:

 

	2005	2005	2005	2005	2005
	1. árs-	2. árs-	3. árs-	4. árs-	Allir
	fjórðungur	fjórðungur	fjórðungur	fjórðungur	Fjórðungar
Rekstrartekjur	1.005.555	1.306.234	1.249.292	954.270	4.515.351
Rekstrargjöld án afskrifta	780.224	976.365	934.073	644.230	3.334.892
Rekstrarhagnaður án afskrifta (EBITDA)	225.332	329.868	315.219	310.040	1.180.459
Afskriftir	57.795	61.135	60.792	57.511	237.234
Rekstrarhagnaður (EBIT)	167.536	268.733	254.427	252.529	943.226
Fjármunatekjur og (fjármagnsgjöld)	(3.430)	(62.429)	(76.968)	(86.339)	(229.166)
Hagnaður fyrir skatta	164.106	206.304	177.459	166.190	714.060
Hagnaður af sölu dótturfélags			90.158		90.158
Skattar tímabilsins	(28.117)	(43.336)	(64.716)	(34.055)	(170.224)
Hagnaður tímabilsins	135.989	162.968	202.901	132.135	633.994

 

 

 

Starfsmenn

Starfsmenn samstæðu Jarðborana voru að jafnaði 151 á árinu 2005. Hjá Jarðborunum innanlands störfuðu 83 starfsmenn en starfsmenn erlendis voru 23. Starfsmenn Björgunar voru 45.

 

Helstu þættir úr starfseminni innanlands

Góður vöxtur var í starfsemi samstæðu Jarðborana á árinu 2005 sem kemur fram í um 16,7% veltuaukningu. Þar ber hæst aukin umsvif í borstarfsemi auk nýrra viðfangsefna á sviði byggingariðnaðar.

Rekstur Björgunar gekk vel á árinu 2005 og er fjárhagur félagsins traustur. Efnissala var ágæt á árinu enda mikið byggt og malbikað á markaðssvæði félagsins.

Vinna við strandhverfin á Sjálandi og á Kársnesi í Kópavogi heldur áfram. Dælingum við landgerð á Sjálandi er lokið og byggingar langt komnar í öðrum áfanga hverfisins og unnið er við lagningu gatna og lagna í þriðja áfanga. Þess má geta að smíði bygginga í þriðja og síðasta áfanga Sjálands hófst nú um síðustu áramót. 

Sem eðlilegt er hafa hækkanir á lóðaverði og húsbyggingum á árinu 2005 jákvæð áhrif á rekstur Björgunar. Ágætur stígandi var í landfyllingum og hafin var bygging á öðru fjölbýlishúsinu á vegum fyrirtækisins.  

Framkvæmdir eru hafnar við byggingu fjölbýlishúss að Strandvegi 5 við Sjáland í Garðabæ og er húsið nú fokhelt. Mikil spurn hefur verið eftir íbúðum við Sjáland og eru bundnar góðar vonir við sölu þessara íbúða en tvær íbúðir í húsinu eru þegar seldar. Þetta er annað byggingaverkefnið sem ráðist er í á Sjálandi en lokið var við fjölbýlishús að Strandvegi 7 á síðasta ári.

Á árinu 2005 hefur borrekstur félagsins einkum snúist um áframhaldandi verkefni frá árinu áður við háhitaboranir, en í upphafi árs voru í gildi allstórir verksamningar um háhitaboranir, bæði fyrir Orkuveitu Reykjavíkur og Hitaveitu Suðurnesja. Bæði þessi verk tengjast stækkun Norðuráls á Grundartanga eins og kunnugt er. Árangur af borunum hefur verið góður og í samræmi við áætlanir verkkaupa. Verkefnin fyrir Orkuveitu Reykjavíkur hafa auk háhitaborana tekið til borunar á niðurrennslisholum, vatnstökuholum, vatnskönnunarholum og svelgholum. Stóran hluta ársins hafa því verið allt að fjórir borar að verki á heiðinni. Hluti borflotans, þ.m.t. hinn nýi hátæknibor Jarðborana, Geysir, hefur nú þegar borað dýpstu háhitaholu landsins á Reykjanesi en holan er 3.060 m djúp.

Auk háhitaverkefna hafa verið veruleg umsvif við lághitaboranir fyrir hitaveitur víðsvegar um landið og má þar nefna borun á Hjalteyri við Eyjafjörð fyrir Norðurorku, borun rannsóknarholu í Vestmannaeyjum fyrir Hitaveitu Suðurnesja og einkar vel heppnað verkefni við Urriðavatn fyrir Hitaveitu Egilsstaða og Fella. 

Auk ofangreindra framkvæmda hafa minni borar félagsins vart annað eftirspurn við rannsóknarboranir, sérstaklega fyrir jarðhita sem og ýmiss konar mannvirkjagerð.

Hinn 29.8. s.l. undirrituðu Jarðboranir samning um sölu á öllum hlutabréfum sínum í Einingaverksmiðjunni og nær rekstur Einingaverksmiðjunnar í samstæðu Jarðborana til þess tíma.

Starfsemin erlendis

Verkefnin á Azoreyjum gengu afar vel á árinu en jarðborinn Jötunn boraði sína síðustu háhitaholu í þessum áfanga í desember s.l. Framkvæmdin gekk samkvæmt áætlun og stóðst væntingar um afköst. Um 23 starfsmenn komu að verkinu á Azoreyjum en  verkefnið fengu Jarðboranir og dótturfélagið, Iceland Drilling (UK) Ltd. í kjölfar alþjóðlegs útboðs innan EES. Er samningurinn hinn stærsti sem Jarðboranir hafa gert vegna framkvæmda erlendis en síðari hluti framkvæmdanna var boðinn út í lok ársins og eru vonir bundnar við að Iceland Drilling hljóti verkefnið.

 

 

Verkkaupinn, Soego, er metnaðarfullt fyrirtæki sem gerir miklar kröfur til verktaka líkt og á við um íslensku orkufyrirtækin. Stefna heimamanna er að nýta orkuna á eyjunum markvisst og á fjölbreyttan hátt og m.a. hefur verið ákveðið að tvöfalda framleiðslu á vistvænni orku á árinu 2007. Stefnt er að frekara samstarfi Soego og Jarðborana þar sem horft verður sérstaklega til fjölnýtingar jarðhita, en þar fara áherslur fyrirtækjanna greinilega saman, auk þess sem sú vakning sem er í umhverfismálum þar ytra fellur vel að umhverfisstefnu Jarðborana.

 

Samhliða hinu mikilvæga háhitaverkefni á Azoreyjum er á vegum Iceland Drilling unnið að frekari öflun verkefna á erlendri grund, í Þýskalandi, Póllandi, Austurríki, Austur-Evrópu og víðar. Auknar horfur eru á að eignaraðild Jarðborana að fyrirtækinu Enex, sem vinnur að verkefnaöflun víða um heim, geti skilað árangri. Fyrstu verkefni Enex ytra eru nú að fara af stað en mörg verkefni félagsins tengjast boriðnaði. Í hópi hluthafa Enex eru öll stærstu þekkingarfyrirtækin á sviði orkuiðnaðar á Íslandi, bæði veitufyrirtæki og ráðgjafarfyrirtæki.

Starfsemi Jarðborana erlendis hefur tekið breytingum á undanförnum árum í samræmi við framtíðarsýn félagsins. Ötullega verður unnið að því áfram að efla starfsemina ytra með hliðsjón af fyrri árangri og nýjum sóknarfærum.

Framtíðarhorfur

Verkefnastaða samstæðu Jarðborana innanlands sem utan árið 2006 er afar góð og horfur eru á veltuaukningu á milli ára.

Helstu verkefni ársins á sviði borframkvæmda eru fyrir Orkuveitu Reykjavíkur á Hellisheiði og Hengilssvæði en samningur milli Orkuveitu Reykjavíkur og Jarðborana er undirritaður var í nóvember s.l. nær til ársins 2009. Þessi samningur er sá stærsti og mikilvægasti sem fyrirtækið hefur gert. Samningurinn tekur til borunar á yfir 40 holum, þar af 30 háhitaholum á Hellisheiði og Hengilssvæði. Aðrar helstu framkvæmdir eru fyrir Hitaveitu Suðurnesja á Reykjanesi og Landsvirkjun og Þeistareyki ehf á vestursvæði Kröflu, Bjarnarflagi og að Þeistareykjum en samningur um ofangreind verkefni var undirritaður í janúar 2006. 

Áfram verður unnið á vegum Björgunar að undirbúningi verkefna á sviði strandhverfa á Sjálandi og í Kópavogi.

Ársreikningur Jarðborana

Ársreikning Jarðborana fyrir árið 2005 má nálgast á heimasíðu félagsins  www.jardboranir.is

Hlutverk félagsins og framtíðarsýn

Hlutverk Jarðborana er að afla viðskiptavinum sínum og hluthöfum verðmæta og auka þannig hagsæld í samfélaginu. Félagið annast framkvæmdir á alþjóðlegum vettvagni og felst starfsemin einkum í nýtingu auðlinda í jörð, vinnslu jarðefna, landgerð og gerð mannvirkja.

Í krafti frumkvæðis, kunnáttu  og markaðsstarfs einsetja Jarðboranir sér að njóta alþjóðlegrar viðurkenningar sem færustu sérfræðingar á sínu sviði og ávinna sér traustan og vaxandi sess sem framúrskarandi fjárfestingarkostur.

 

Stjórn félagsins og forstjóri

Stjórn Jarðborana skipa: Guðmundur Þóroddson, formaður, Þorsteinn Vilhelmsson, Magnús Jónsson, Hrafn Magnússon og Aðalsteinn Karlsson.  Forstjóri félagsins er Bent S. Einarsson. 

 

Nánari upplýsingar veitir Bent S. Einarsson, forstjóri.